PROF TUMAINI NAGU AKAGUA HUDUMA ZA AFYA MOSHI DC, ASISITIZA UBORA NA UWAJIBIKAJI

Posted on: February 23rd, 2026

PROF TUMAINI NAGU AKAGUA HUDUMA ZA AFYA MOSHI DC, ASISITIZA UBORA NA UWAJIBIKAJI

Naibu Katibu Mkuu, Ofisi ya Waziri Mkuu – TAMISEMI anayesimamia masuala ya Afya, Prof. Tumaini Nagu, amefanya ziara katika Halmashauri ya Wilaya ya Moshi kukagua mifumo ya utoaji huduma, utendaji kazi wa watumishi, pamoja na maendeleo ya ujenzi wa miundombinu ya sekta ya afya.

Katika ziara hiyo, Prof. Nagu aliambatana na wataalamu kutoka Ofisi ya Waziri Mkuu – TAMISEMI, Mganga Mkuu wa Mkoa wa Kilimanjaro, Mganga Mkuu wa Halmashauri ya Wilaya ya Moshi pamoja na wataalamu wa ngazi ya mkoa na wilaya.

Prof. Nagu na timu yake alitembelea Hospitali ya Halmashauri ya Wilaya ya Moshi iliyopo Kata ya Mabogini, ambapo alikagua wodi mbalimbali, maabara, duka la dawa na mifumo ya TEHAMA inayosimamia mfumo wa GOTHOMIS katika kusimamia ukusanyaji wa mapato na kutunza taarifa za wagonjwa. Pia alipata fursa ya kuzungumza na watumishi wa afya na kusisitiza umuhimu wa uwajibikaji, weledi na utoaji wa huduma kwa kuzingatia maadili ya taaluma.

Aidha, alitembelea Kituo cha Afya cha Uru Kusini ambako alikagua miundombinu ya jengo la mama na mtoto, chumba cha dharura pamoja na upatikanaji wa dawa na vifaa tiba. Alielekeza uongozi wa halmashauri kuendelea kuboresha mazingira ya kazi kwa watumishi na kuhakikisha wananchi wanapata huduma bora, kwa wakati na kwa viwango vinavyotakiwa.

Akizungumza na watumishi wa Hospitali ya Halmashauri ya wilaya na Kituo cha afya cha Uru Kusini, Prof. Nagu alisisitiza uwajibikaji na utoaji wa huduma kwa kuzingatia maadili ya taaluma.

“Serikali imeendelea kuwekeza fedha nyingi katika sekta ya afya ili kusogeza huduma karibu na wananchi. Ni wajibu wenu kuhakikisha uwekezaji huu unaleta matokeo chanya kwa kutoa huduma bora, zenye utu na kwa wakati,” alisema Prof. Nagu.

Aliongeza kuwa usimamizi madhubuti wa rasilimali watu na vifaa tiba ni msingi wa kuimarisha imani ya wananchi kwa huduma za afya za umma.

Kwa upande wake, Mganga Mkuu wa Mkoa wa Kilimanjaro Dkt Jair Khanga alisema mkoa utaendelea kushirikiana na halmashauri kuhakikisha viwango vya utoaji huduma vinaimarika na matumizi ya mifumo katika kutoa huduma inasimamiwa vizuri.

“Tutaendelea kufanya ufuatiliaji wa karibu ili kuhakikisha changamoto zinazobainika zinapatiwa ufumbuzi wa haraka na huduma zinatolewa kwa kuzingatia miongozo ya kitaifa,” alisema Dkt. Khanga

Naye Mganga Mkuu wa Halmashauri ya Wilaya ya Moshi Dkt Juma Mombokaleo alieleza kuwa ziara hiyo imekuwa chachu ya kuongeza morali kwa watumishi na kubaini maeneo yanayohitaji maboresho zaidi na kuomba muda wa mwezi mmoja kurekebisha kasoro ndogondogo zilizobainishwa.

“Maelekezo tuliyoyapata yatatusaidia kuongeza ufanisi katika usimamizi wa huduma, hususan katika maeneo ya dharura, afya ya mama na mtoto na upatikanaji wa dawa pamoja na matumizi ya mfumo wa GOTHOMIS” alisema Dkt Mombokaleo.

Ziara hiyo imelenga kuimarisha usimamizi, kuongeza ufanisi katika utoaji wa huduma za afya na kuhakikisha fedha za miradi ya maendeleo zinatumika kama ilivyokusudiwa kwa manufaa ya wananchi.