WAZIRI MKUU DKT MWIGULU NCHEMBA ARIDHISHWA NA UBORA WA JENGO LA UTAWALA HALMASHAURI YA WILAYA YA MOSHI

Posted on: February 20th, 2026

Waziri Mkuu wa Jamhuri ya Muungano wa Tanzania, Mwigulu Nchemba, amezindua rasmi jengo la utawala la Halmashauri ya Wilaya ya Moshi lililogharimu zaidi ya shilingi bilioni 3.2 na kueleza kuridhishwa kwake na ubora pamoja na thamani ya fedha iliyotumika katika ujenzi wake.

Hafla hiyo imefanyika leo tarehe 20 Februari 2026 wakati wa ziara yake ya kutembelea na kukagua miradi mbalimbali ya maendeleo katika Halmashauri ya Wilaya ya Moshi.

Akizungumza katika hafla hiyo, Waziri Mkuu amesema jengo hilo ni kielelezo cha uwajibikaji na usimamizi mzuri wa rasilimali za umma, akisisitiza kuwa Serikali itaendelea kuimarisha miundombinu ya kiutawala ili kuongeza ufanisi wa utoaji huduma kwa wananchi.

Uzinduzi huo umeambatana na upandaji wa mti wa kumbukumbu mbele ya jengo la Utawala la halmashauri ya Moshi huku akisisitiza kutunza mazingira ili thamani ya jengo iendane na utunzaji wa mazingira yake.

Katika hotuba yake kwa wananchi, Waziri Mkuu alieleza mafanikio makubwa yaliyopatikana chini ya Serikali ya Awamu ya Sita inayoongozwa na Rais Samia Suluhu Hassan, hususan katika sekta za elimu na afya.

Alibainisha kuwa Serikali imewekeza kwa kiasi kikubwa katika ujenzi wa shule mpya za msingi na sekondari, uboreshaji wa miundombinu ya vyuo, ujenzi wa hospitali za wilaya, vituo vya afya na zahanati katika maeneo mbalimbali ya nchi.

Uwekezaji huo umeongeza upatikanaji wa huduma za kijamii karibu na wananchi na kupunguza changamoto zilizokuwepo hapo awali, akiahidi kuwa Serikali itaendelea kusimamia miradi ya maendeleo kwa weledi, uwazi na uwajibikaji.

Wananchi waliohudhuria hafla hiyo walionesha furaha na matumaini yao kuwa uwepo wa jengo hilo jipya la utawala utaongeza kasi ya utoaji huduma na kurahisisha upatikanaji wa huduma za halmashauri kwa wakati.